 బజ్జీ మసాలా పొడి
|
ధనియాలు - పావుకిలో జీలకర్ర - 50 గ్రాములు గసగసాలు - 50 గ్రాములు సోంపు - 50గ్రాములు అనాసపువ్వు - 50 గ్రాములు జాపత్రి - 50 గ్రాములు జాజికాయ - 50 గ్రాములు మరాఠిమొగ్గ - 50 గ్రాములు వెల్లుల్లి - 50 గ్రాములు నువ్వులు - 50 గ్రాములు.
ధనియాలను కొద్దిగా వేయించి పక్కన పెట్టుకోవాలి. జీలకర్ర, సోంపు కూడా కొద్దిగా వేడి చెయ్యాలి.
చల్లారాక ఇందులో మిగతా మసాల దినుసులన్నీ వేసి మెత్తగా పొడి చేసి పక్కన పెట్టుకోవాలి.
 సాంబారుపొడి
సాంబారుపొడి
|
శెనగపప్పు - రెండు టేబుల్ స్పూన్లు ఎండుమిరిపకాయలు - 5 ధనియాలు - ఒక టేబుల్ స్పూను జీలకర్ర - ఒక టీ స్పూను ఇంగువ - కొద్దిగా మెంతులు - ఒక టీ స్పూను ఉప్పు - తగినంత నూనె - తగినంత పసుపు - అర టీ స్పూను.
స్టౌ వెలిగించి మందపాటి గిన్నె పెట్టి కొద్దిగా నూనె వేసి శెనగపప్పు దోరగా వేయించాలి.
తరువాత మెంతులు, జీలకర్ర, ధనియాలు, ఇంగువ, ఎండు మిరపకాయలు కూడా వేసి వేయించుకోవాలి.
వీటిని చల్లారనిచ్చి తగినంత ఉప్పు, పసుపు వేసి మిక్సీలో మెత్తగా పొడి చేసుకోవాలి.
 ధనియాల పొడి
|
ధనియాలు - 100 గ్రాములు మినప్పప్పు - ఒక టేబుల్ స్పూను శెనగపప్పు - ఒక టేబుల్ స్పూను ఎండు మిరపకాయలు - 10 పసుపు - అర టీ స్పూను ఉప్పు - తగినంత నూనె - సరిపడా.
స్టౌ మీద మందపాటి గిన్నె పెట్టి కొద్దిగా నూనె వేసి శెనగపప్పు, మినప్పప్పు వేయించాలి. ఎర్రగా వేగాక వాటిని తీసి ఒక పేపర్పై వేసుకోవాలి.
అదే గిన్నెలో ధనియాలు, ఎండుమిరపకాయలు వేసి కొద్దిగా వేయించి దించేయాలి. బాగా చల్లారాక కొద్దిగా పసుపు, తగినంత ఉప్పు వేసి మిక్సీలో పొడి చేసుకోవాలి.
 సొంటిపొడి
|
సొంటి - 100 గ్రాములు ఉప్పు - తగినంత.
సొంటిని చిన్న చిన్న ముక్కలుగా చేసి మిక్సీలో వేసి మెత్తగా పొడి చేసుకోవాలి.
ఈ పొడిలో సొంటి నారలు ఉంటాయి కాబట్టి దీన్ని జల్లెడ పట్టుకోవాలి. జల్లెడ పట్టాక వచ్చిన పొడిని సీసాలో భద్రపరుచుకోవాలి.
ఎప్పుడు తీనాలనిపిస్తే అప్పుడు ఉప్పు కలుపుకోవాలి. అన్నంలో తినేటప్పుడు నెయ్యి వేసుకుని తినాలి.
 నువ్వులపొడి
|
నువ్వులు - 100 గ్రాములు పల్లీలు - 50 గ్రాములు పుట్నాలు - 50 గ్రాములు మెంతులు - ఒక టీ స్పూను జీలకర్ర - ఒక టీ స్పూను ఎండు మిరపకాయలు - 10 ధనియాలు - ఒక టేబుల్ స్పూను ఎండు కొబ్బరి పొడి - ఒక టేబుల్ స్పూను పసుపు - అర టీ స్పూను ఉప్పు - తగినంత.
స్టౌ మీద మందపాటి గిన్నె పెట్టి నువ్వుల్ని వేయించి దించేయాలి.
తరువాత పల్లీలను కూడా వేసి దోరగా వేగనిచ్చి తీసేయాలి. తరువాత పుట్నాలు వేసి వేడెక్కాక తీసేయాలి.
ఈసారి మెంతులు, జీలకర్ర, ఎండుమిరపకాయలు, ధనియాలు, ఎండు కొబ్బరి పొడి వేసి కొద్దిగా వేగనిచ్చి తీసేయాలి. ఇవన్నీ బాగా చల్లారాక తగింత ఉప్పు, పసుపు వేసి మిక్సీలో వేసి మెత్తగా పొడి చేసుకోవాలి.
